کتابِ مقدس کی تفسیر

حزقی ایل

Ezekiel

از

وِلیم میکڈونلڈ

اِس تفسیر کی مدد سے آپ کلامِ خدا کے مندرجات کو زیادہ صفائی اور آسانی سے سمجھ سکتے ہیں۔ یہ بڑے چُست، مودَّب، پُر خلوص، سنجیدہ اور عالمانہ انداز میں لکھی گئی ہے۔ اِس کا اِنتخاب آپ کے شخصی گیان دھیان اور گروہی مطالعۂ بائبل کے لئے بہت مفید ثابت ہو گا

Believer’s Bible Commentary

by

William MacDonald

This is a Bible commentary that makes the riches of God’s Word clear and easy for you to understand. It is written in a warm, reverent, and devout and scholarly style. It is a good choice for your personal devotions and Bible study.

© 1995 by William MacDonald, Believer’s Bible Commentary
Christian Missions in Many Lands, Inc.
PO Box 13, Spring Lake, NJ 07762
USA
— All Rights Reserved —

مقدمه

’’حزقی ایل کے پہلے سے آخری باب تک ایک اعلیٰ اور بلند پایہ خیال کا سلسلہ پایا جاتا ہے اور وہ ہے خداوند خدا (‏یہوواہ)‏ کی حاکمیتِ اعلیٰ اور جلال۔ وہ اِسرائیل میں اور دُنیا کی قوموں کے معاملات میں حاکمِ اعلیٰ ہے‏، اگرچہ ایسا معلوم ہوتا ہے کہ اِنسانوں کے بلند بانگ اور تند و تیز دعوے سچائی کو چھپانے کی کوشش کرتے ہیں۔ اپنی اِسی مطلق مرضی سے خدا نے ٹھہرایا ہے کہ ہم اپنی زندگی میں اُس کی تمجید کریں اور دُنیا کی اِنتہا تک اُس کی گواہی دیں۔ ‘‘ (‏چارلس لی فِین برگ)‏

۱۔ مُسلَّمہ کتب میں یکتا مقام

بدقسمتی سے اِس مشکل کتاب کے بارے میں ہمارا بائبل کا علم زیادہ گہرا نہیں ہے۔ علم و ادب سے دلچسپی رکھنے والے کئی افراد ہیں جو اِس نبی کے قابلِ ذکر اُسلُوبِ بیان کے باعث بائبل مقدس پر فریفتہ ہیں۔ 

حزقی ایل کی غیر معمولی بات یہ ہے کہ وہ (‏یرمیاہ اور کسی حد تک یسعیاہ اور انبیائے اصغر کے برعکس)‏ خدا کے عدالت کرنے اور سزا دینے پر نہیں بلکہ خدا کے اپنے لوگوں کو تسلی دینے پر زور دیتا ہے۔ حزقی ایل نے نہرکبار کے کنارے سے (‏جہاں بابل کے قریب شاید کوئی قدیم مشقت کیمپ قائم تھا)‏ یہ پیش گوئیاں لکھیں۔ اِن سے یہودی جلاوطنوں کی حوصلہ افزائی ہوئی۔ 

۲۔ مصنف

حزقی ایل (‏خدا مضبوط کرتا ہے یا خدا کا مضبوط کیا ہوا)‏ اسیروں کے اُس دوسرے گروہ میں شامل تھا جو یروشلیم کی بربادی سے گیارہ (‏۱۱)‏ برس پہلے بابل میں لائے گئے۔

۱۹۲۰ کی دہائی تک حزقی ایل کی نبوت کی کتاب اِستدلال پسند نقادوں کی قینچی سے بچی رہی۔ بعض آزاد خیال علما نے بڑی تیزی سے نظریات گھڑے جن میں اِس کتاب کی موضوع کی یکسانیت‏، حزقی ایل کی تصنیف ہونے اور روایات کے مطابق تاریخِ تصنیف سے اِنکار کیا۔ 

حقیقت یہ ہے کہ قدیم سے یہودیوں اور مسیحیوں کا یہ نظریہ بہت مضبوط ہے کہ یہ کتاب شاعر اور نبی بوزی کے بیٹے حزقی ایل کی تصنیف ہے۔ اور نقادوں کے نظریے کا خوب جواب دیا جا چکا ہے۔ 

جان بی۔ ٹیلر (‏John B. Taylor)‏ نے چھے دلائل دیئے کہ اِس کتاب کے موضوع میں یکسانیت ہے اور یہ ایک ہی مصنف کی تصنیف ہے۔ ہم اِختصار کے ساتھ اِن دلائل کو ہدیۂ قارئین کرتے ہیں۔

1. اِس کتاب میں شروع سے آخر تک تسلسل ہے اور سوچا سمجھا تاثر پیدا کرتی ہے۔ 
2. اِس کتاب میں ایک ہی پیغام ہے __ یروشلیم اور ہیکل کی بربادی
3. اِس کے اندازِ بیان اور زبان میں یکسانیت ہے‏، جن میں خصوصی تراکیب اور اجزائے جملہ بھی شامل ہیں مثلاً ’’آدم زاد‘‘‏، ’’خداوند کا کلام مجھ پر نازل ہوا‘‘۔ ’’وہ جانیں گے کہ مَیں خداوند ہوں اور خداوند کا جلال‘‘۔ 
4. حزقی ایل میں ایک واضح اور معین تواریخی ترتیب موجود ہے جو انبیائے اکبر کا طرۂ اِمتیاز ہے (‏دیکھئے یسعیاہ اور یرمیاہ)‏۔ 
5. کتاب میں شروع سے آخر تک واحد متکلم کا صیغہ استعمال ہوا۔ یہ اِس کتاب کو اِمتیازی طور پر خود نوشت سرگذشت ثابت کرتا ہے۔ ۱:‏۳ اور ۲۴:‏۲۴ میں شناخت کرائی گئی ہے کہ مصنف حزقی ایل ہے۔ 
6. کتاب میں حزقی ایل کی شخصیت اور کردار شروع سے آخر تک یکساں ہیں۔ اِس کا اِشتیاق اور صدق دلی‏، علامات کے استعمال کی لگن‏، تفاصیل پر توجہ اور خدا کے جلال اور فضیلت و فوقیت سے ہیبت زدہ ہونا اِس خصوصیت کو ظاہر کرتا ہے۔ 

۳۔ سنِ تصنیف

حزقی ایل نے اپنی نبوتوں کی تاریخیں بڑی صحت کے ساتھ درج کی ہیں۔ اُس کی پہلی نبوت (‏۱:‏۲)‏ یہویاکین کی جلاوطنی کے پانچویں سال (‏۵۹۳ ق م)‏ میں ملی۔ اور آخری نبوت جس کی تاریخ دی گئی ہے وہ ۵۷۱ ق م (‏۲۹:‏۱۷)‏ میں ملی۔ یوں اُس کی خدمت کا عرصہ کم سے کم بائیس سالوں پر محیط ہے۔ اگر کاہن کی حیثیت سے اُس کی خدمت تیس برس کی عمر میں شروع ہوئی تو نبوت کی خدمت کے اِختتام پر اُس کی عمر پچاس برس سے زیادہ تھی۔ 

۴۔ پس منظر اور موضوعات

حزقی ایل نے اسیری سے فوراً پہلے شروع کر کے کم و بیش بیس سالوں کے عرصے کے دوران اُن لوگوں کے درمیان خدمت کی جن کے ساتھ وہ خود بھی اسیری اور جلاوطنی میں تھا۔ وہ جھوٹی اُمید لگائے بیٹھے تھے کہ ہم یروشلیم واپس جائیں گے چنانچہ اُس نے اُنہیں تعلیم دی کہ پہلے تم کو خداوند کے پاس واپس آنا ہو گا۔ 

حزقی ایل کی نبوت کو تین حصوں میں تقسیم کیا جاتا ہے۔ پہلے وہ یہوداہ کے گناہ گنواتا ہے اور خبردار کرتا ہے کہ خدا کا غضب عنقریب نازل ہوا چاہتا ہے اور تمہاری اسیری اور دارالحکومت کی بربادی کی صورت میں ظاہر ہو گا۔ اِس کا واضح اور صاف صاف اعلان غیر معمولی رُؤیاؤں اور علامتی کاموں سے کیا گیا ہے۔ ایک روشن اور چمک دار بادل جو خدا کی حضوری کا نشان ہے ہیکل کے اوپر منڈلاتا نظر آتا ہے‏، پھر نہ چاہتے ہوئے بھی وہاں سے ہٹ جاتا ہے۔ اِس کا مطلب ہے کہ لوگوں کے گناہوں کے باعث خدا اُن کے درمیان مزید سکونت نہیں کر سکتا۔ اور ضرور ہے کہ اُس کے غضب کی تلوار عنقریب گناہ سے ناپاک شدہ ہیکل پر آ پڑے۔ خداوند کا جلال ایک ایسا کلیدی تصور ہے جو حزقی ایل کی کتاب کے شروع سے آخر تک موجود ہے۔ 

دوسرے حصے میں یہوداہ کی پڑوسی قوموں کو اُن کی بت پرستی اور خدا کے لوگوں کے ساتھ بدسلوکی کرنے کی پاداش میں مغلوب اور ملعون کیا گیا ہے۔ یہ قومیں ہیں عمونی‏، موآبی‏، ادومی‏، فلستی‏، صوری‏، صیدانی اور مصری۔

اور آخری حصے میں حزقی ایل پوری قوم __ اِسرائیل اور یہوداہ دونوں __ کی بحالی اور دوبارہ اتحاد کا بیان کرتا ہے۔ جب لوگ توبہ کریں گے تو خدا اپنا پاک روح اُن کے باطن میں ڈالے گا۔ مسایاح (‏مسیحِ موعود)‏ اپنے لوگوں کے پاس آئے گا اور اُن کے آخری دشمنوں کو نیست کر دے گا۔ ہیکل از سرِنو تعمیر کی جائے گی اور خدا کا جلال اُس میں واپس آ جائے گا۔ یہ نبوتیں (‏پیش گوئیاں)‏ ابھی پوری نہیں ہوئیں بلکہ زمین پر مسیح کے ہزار سالہ دَورِ حکومت کی منتظر ہیں۔ 

نبوت کی بہت سی دوسری کتابوں کی طرح حزقی ایل کی کتاب بھی پورے طور سے تواریخی ترتیب میں نہیں‏، تاہم یسعیاہ اور یرمیاہ کی نسبت زیادہ ترتیب وار ہے۔ بہت سے ابواب کے شروع میں تاریخیں یا تاریخی ادوار درج ہیں اور ہمیں اُن کو توجہ سے دیکھنا چاہئے۔ البرٹ بارنز (‏ Albert Barnes)‏ نے نبوتوں کو مندرجہ ذیل تواریخی ترتیب دی ہے:‏

مختلف ابواب کے شروع میں دی گئی تاریخوں کے مطابق نبوتوں کی گروہ بندی کی گئی ہے۔ جو نبوتیں تاریخوں کے بغیر ہیں اُن کے لئے ہم فرض کر سکتے ہیں کہ وہ اِن سے پہلے مذکور تاریخ کو یا کم سے کم اِس کے بہت جلد بعد دی گئیں۔ 

حزقی ایل نے خدا کا کلام بابل سے میلوں دُور یہودیہ میں کیسے پہنچایا؟ اِس نکتے پر ڈیلی نوٹس آف سکرپچر یونین (‏Daily Notes of Scripture Union)‏ یوں کہتے ہیں:‏

’’اِس کتاب کی ایک مشکل یہ ہے کہ حزقی ایل نے دُور دراز یروشلیم میں رہنے والوں کی خدمت کیسے کی جب کہ وہ خود بابل میں اسیر اور جلاوطن تھا۔ یہ بات قرینِ قیاس ہے کہ ان جلاوطنوں کو اپنے وطن کے ساتھ رابطہ رکھنے اور رسل و رسائل کی آزادی تھی۔ دونوں شہروں کے درمیان علاقے پر بھی بابلیوں کا قبضہ تھا اور اُنہوں نے امن و امان قائم کر رکھا تھا۔ زمانۂ سابق کی نسبت حزقی ایل کے دَور میں رابطہ رکھنا زیادہ آسان ہو چکا تھا۔ کسی بھی قاصد کے لئے حزقی ایل کے علامتی کاموں کو اپنے الفاظ میں بیان کرنا نسبتاً آسان تھا جب کہ اُس کا زبانی پیغام یاد داشت میں دُھندلا پڑ سکتا ہے اور تحریری پیغام بابل کے حاکموں کو متوجہ کر سکتا تھا۔‘‘